24 March 2017

அரசியல் அமைப்பில் திருத்தம் மேற்கொள்வதற்கான சந்தர்ப்பத்தை பயன்படுத்திக்கொள்ளவேண்டும் - டியூ குணசேகர

அனைத்து கட்சிகளும் அரசியல் அமைப்பில் திருத்தம் மேற்கொள்ள விருப்பம் தெரிவித்துள்ளதை சிறந்த சந்தர்ப்பமாக பயன்படுத்திக்கொள்ளவேண்டும். அத்துடன் அரசியலமைப்பில் நிறைவேற்று ஜனாதிபதி முறைமை இல்லாமலாக்கப்படவேண்டும் என்பதுவே எமது கட்சியின் நிலைப்பாடாகும் என இலங்கை கம்யூனிஸ்ட் கட்சியின் செயலாளரும் முன்னாள் அமைச்சருமான டியூ குணசேகர தெரிவித்தார்

இவ்வாறான நிலையில் பாராளுமன்றத்தில் இருக்கும் அனைத்து இன கட்சிகளும் அரசியலமைப்பில் திருத்தம் மேற்கொள்வதற்கு ஏகமானதாக தீர்மானம் நிறைவேற்றின. அதனடிப்படையில் அரசியலமைப்பு திருத்தம் தொடர்பாக ஆராய்வதற்கு குழுக்கள் அமைத்து கருத்துக்கள் கேட்டறியப்பட்டன. தற்போது அந்த பணிகள் நிறைவடைந்து சட்டமூலம் தயாரிக்க இருக்கின்றது. ஆனால் சட்டமூலம் தயாரிக்கப்பட முன்பே அரசியலமைப்பு தொடர்பாக பல்வேறு கருத்துக்கள் தெரிவிக்கப்பட்டு வருகின்றன. 

அரசியலமைப்பில் ஏற்படுத்தக்கூடிய திருத்தத்தில் யாருக்காவது பாதிப்பு ஏற்படுவதாக இருந்தால் அதனை பாராளுமன்றத்தில் முன்வைத்து அது தொடர்பாக திருத்தங்களை மேற்கொள்ளலாம். ஆனால் தற்போது தெரிவிக்கப்படும் குற்றச்சாட்டுக்கள் கருத்து வேறுபாடுகள் வீணாக காலத்தை தாழ்த்துவதாகும் அத்துடன் அரசியலமைப்பில் நிறைவேற்று ஜனாதிபதி முறைமை இல்லாமலாக்கப்படவேண்டும் என்பதுவே எமது கட்சியின் நிலைப்பாடாகும். அதனை நாங்கள் தெளிவாக தெரிவித்துள்ளோம்.

குறிப்பாக சிங்கள மொழி 1956ஆம் ஆண்டு அரச கரும மொழியாதக்கப்படுகின்றபோதும் 1987ஆம் ஆண்டே தமிழ் மொழி அரசகரும மொழியாக்கப்படுகின்றது. அத்துடன் தமிழ் மொழி அரசகரும மொழியாக நிறைவேற்றப்பட்டு 30வருடங்கள் கழிந்தும் இன்னும் சரியான முறையில் நடைமுறைப்படுத்தவில்லை.அதனால் நாட்டு மக்கள் அனைவரும் சம உரிமைகளைப்பெற்றவர்கள் என்பது தெளிவாவதில்லை.

சிறுபான்மை இன மக்களும் இந்த நாட்டு பிரஞைகள் என்றவகையில் அவர்களுக்கும் அரசியலமைப்பினூமாக சம உரிமை வழங்கப்படவேண்டும். இனப்பிரச்சினைக்கு தீர்வு வழங்கப்படவேண்டும். அத்துடன் நாட்டுக்குள் இன, மதங்களுக்கிடையில் பிரச்சினை ஏற்படுமானால் நாட்டை ஒருபோதும் அபிவிருத்தியின்பால் இட்டுச்செல்ல முடியாதென இலங்கை கம்யூனிஸ்ட் கட்சியின் தலைமையகத்தில் இன்று இடம்பெற்ற செய்தியாளர் சந்திப்பில் கலந்துகொண்டு உரையாற்றும் போது கட்சியின் செயலாளரும் முன்னாள் அமைச்சருமான டியூ குணசேகர மேலும் தெரிவித்தார்.

நன்றி- வீரகேசரி

30 November 2016

தீர்வு கிடைக்காவிட்டால் அடுத்தகட்ட நடவடிக்கை தொடரும்

நாடு முழுவதிலுமுள்ள வைத்தியர்கள் இன்று பணி பகிஷ்கரிப்பை முன்னெடுத்துள்ளனர். இன்று காலை 8.00 மணி முதல் 24 மணித்தியாலங்கள் மேற்கொள்வதாக அரச வைத்திய அதிகாரிகள் சங்கம் தெரிவித்திருந்தது. அவசர சிகிச்சை பிரிவு மாத்திரம் இயங்கும் என தெரிவித்துள்ள வைத்திய அதிகாரிகள் சங்கத்தினர் மகளிர் வைத்தியசாலை, சிறுவர் வைத்தியசாலை, புற்றுநோய் வைத்தியசாலை, சிறுநீரக பிரிவு ஆகிய வழமை போலவே இயங்கும் எனத் தெரிவிக்கப்படுகிறது. 

இன்று இடம்பெற்ற அடையாள வேலை நிறுத்தத்தின் பின்னர் சரியான தீர்வு கிடைக்காத பட்சத்தில் அடுத்த கட்ட நடவடிக்கை தொடர்பாக எதிர்வரும் செவ்வாய்கிழமை கூடும் நிறைவேற்றுக் குழுக் கூட்டத்தில் தீர்மானிக்கப்படவுள்ளதாக அரச வைத்திய அதிகாரிகள் சங்கத்தின் பொதுச்செயலாளர் டாக்டர் நவீந்திர டி சொய்சா தெரிவித்துள்ளார். 

அவர் இது குறித்து மேலும் தெரிவிக்கையில் இந்த புதிய வரவ செலவுத் திட்டத்தில் இலவச கல்வி, இலவச சுகாதார சேவை ஆகியவற்றுக்கு முக்கியத்துவம் வழங்கப்படாதிருப்பதாகவும், இது தொடர்பாக ஜனாதிபதி, பிரதமர் உட்பட அனைத்து அமைச்சர்களுக்கும் எழுத்து மூலம் அறிவிக்கப்பட்டிருந்தபோதும் எவ்வித நடவடிக்கையும் மேற்கொள்ளாத காரணத்தினால் தொழிற்சங்க நடவடிக்கையில் இறங்க வேண்டி ஏற்பட்டதாக கூறினார். புதிய வரவ செலவுத் திட்டத்தில் மக்களுக்குரிய நிவாரணங்கள் குறைக்கப்பட்டு மதுபான நிறுவனங்களுக்கு நிவாரணங்கள் வழங்கப்பட்டிருப்பதாக அவர் சுட்டிக்காட்டியுள்ளார். 

இலஞ்சம் அல்லது ஊழல் தொடர்பில் 8,000 முறைப்பாடுகள்

“இலஞ்சம் அல்லது ஊழல் பற்றிய சாத்துதல்களைப் புலனாய்வு செய்வதற்கான ஆணைக்குழுவுக்கு, இலஞ்சம் மற்றும் ஊழல் பற்றிய 8,000 முறைப்பாடுகள் கிடைக்கப்பெற்றுள்ளன. எனினும், 3,264 முறைப்பாடுகள் தொடர்பிலேயே, ஆணைக்குழு விசாரணைகளை முன்னெடுத்து வருகின்றது” என, அவ்வாணைக்குழுவின் தலைவர் நெவில் குருகே தெரிவித்தார். நாடாளுமன்ற மறுசீரமைப்பு மற்றும் வெகுசன ஊடக அமைச்சினால், ஊடகவியலாளர்களுக்காக நேற்றுச் செவ்வாய்க்கிழமை ஏற்பாடு செய்யப்பட்ட, இலஞ்சம் மற்றும் ஊழல் தொடர்பான கருத்தரங்கில் கலந்துகொண்டு உரையாற்றும் போதே, அவர் மேற்கண்டவாறு தெரிவித்தார்.   அங்கு அவர், தொடர்ந்து கூறியதாவது,   “எமது ஆணைக்குழுவுக்கு, இலஞ்சம் மற்றும் ஊழல் பற்றிய 8,000 முறைப்பாடுகள் கிடைக்கப்பெற்றுள்ளன. எனினும் எமது ஆணைக்குழுவுடன் தொடர்புடைய 3264 முறைப்பாடுகள் தொடர்பிலேயே நாம் விசாரணையை முன்னெடுத்து வருகின்றோம்.   எமது ஆணைக்குழுவுக்கு கிடைக்கப்பெறும் முறைப்பாடுகளுக்கமைய, ஒவ்வொரு விசாரணைகளை முன்னெடுப்பதற்கு மொத்தமாக 431 அதிகாரிகளை நியமிப்பதற்கான தேவை உள்ளது. எனினும், தற்போது எம்மிடம் மொத்தமாக 196 அதிகாரிகளே கடமையாற்றி வருகின்றனர். அதிலும், சில அதிகாரிகள், மற்றைய சில விசாரணைகளுக்காக சென்றுவிட்டால், 150 அதிகாரிகளே கடமையில் ஈடுபட்டிருப்பர்” என்றார். 

28 November 2016

பிடல் காஸ்ட்ரோ, சாசுவதமான புரட்சியாளர்

பிடல் காஸ்ட்ரேதா தன்னுடைய 90ஆவது முதிர்ந்த வயதில் இறந்திருக்கிறார். ஆனால், உலகத்தின் கண்களில்  அவரது சித்திரம் என்றென்றும் இளமையாகவும், கியூப புரட்சியின் ஒளிவீசும் தலைவராகவும்தான் நீடித்து நிலைத்து நின்றுகொண்டிருக்கிறது. பிடல், 32ஆவது வயதில் தன்னுடைய புரட்சியாளர்களுடன் ஆட்சியைக் கைப்பற்றினார்.
மிகவும் வெறுக்கத்தக்க பாடிஸ்டா ஆட்சியைத் தூக்கி எறிந்ததன் மூலம், உலகில் மேற்கத்திய அரை உருண்டையில் முதல் சோசலிஸ்ட் புரட்சியை தோழர் பிடல் நிறுவினார். தோழர் பிடலின் வீரமிக்க தலைமையின்கீழ், கியூபா, அரைக் காலனிய நுகத்தடிகளிலிருந்தும், அமெரிக்காவின் `மஃபியா` கூட்டத்திடமிருந்தும் தன்னை விடுவித்துக்கொண்டு முன்னேறியது. அரசாங்கத்திற்குத் தலைமையேற்றிருந்த பிடல், கியூபாவை ஒரு மகத்தான சோசலிச சமூகமாக உருவாக்கினார்.
தோழர் காஸ்ட்ரோவும், அவரது புரட்சிகர அரசாங்கமும் சோசலிசம் என்றால் என்ன  என்பதை உலகுக்குக் காட்டினார்கள். அதாவது, கல்லாமையை இல்லாமையாக்கியது, அனைவருக்கும் கல்வி அளித்தது, வளர்ந்த முதலாளித்துவ நாட்டில் உள்ள மக்களைக் காட்டிலும் சிறந்த விதத்தில் அனைவருக்கும் சுகாதாரப் பாதுகாப்பு அமைப்புமுறை, அனைத்து இடங்களிலும் பெண்களுக்கு சம உரிமை, தோட்டத் தொழிலாளர்களாக இருந்த அடிமைகள் அனைவரையும் விடுவித்து ஓர் இன சமத்துவ அமைப்பு ஆகியவற்றை உருவாக்கினார்.
கியூபா என்னும் ஒரு சிறிய தீவில் சோசலிசம் கட்டி எழுப்பப்படுவதை அமெரிக்க ஏகாதிபத்தியத்திற்கு  சகித்துக்கொள்ளவே முடியாத ஒன்றாக இருந்தது. கடந்த ஐம்பது ஆண்டு காலமாக பிடல் காஸ்ட்ரோ சோசலிஸ்ட் கியூபாவை அழித்திட மேற்கொள்ளப்பட்ட எண்ணற்ற சதிகளையும் முறியடித்தார்.  சிஐஏ அவரைப் படுகொலை செய்திட மேற்கொண்ட நூற்றுக்கணக்கான முயற்சிகள் குறித்து சமீபத்தில் வெளி உலகுக்குத் தெரிய வந்திருக்கிறது.
லத்தீன் அமெரிக்க நாடுகளின் அனைத்துப் புரட்சிகர மற்றும் முற்போக்கு இயக்கங்களுக்கும் கியூபா புரட்சி ஒரு கலங்கரை விளக்காகத் திகழ்ந்தது. அந்நாடுகள் அனைத்திலும் இடதுசாரிதகள் முன்னேறுவதற்கு உத்வேகத்தை ஊட்டியது.  பிடல் காஸ்ட்ரோவும், அவரது நெருங்கிய சக போராளியான சேகுவேராவும் இளம் சந்ததியினருக்கு புரட்சிகர சின்னங்களாக மாறி இருக்கிறார்கள். லெனினுக்கு அடுத்தபடியாக வேறெந்தவொரு கம்யூனிஸ்ட் தலைவரும் பிடல் அளவிற்கு சர்வதேசப் புகழை (internationalist vision)எட்டியதில்லை. புரட்சிகர கியூபா, உலகம் முழுதும் நடைபெற்ற புரட்சிகரப் போராட்டங்களுக்கு, குறிப்பாக லத்தீன் அமெரிக்கா மற்றும் ஆப்ரிக்காவில் நடைபெற்ற போராட்டங்களுக்கு  அனைத்துவிதமான உதவிகளையும் அளித்து வந்தது.
தென் ஆப்ரிக்காவில் இனவெறி ஆட்சியாளர்களுக்கு உதவி வந்த எதிர்ப்புரட்சி சக்திகளுக்கு எதிராகப் போராடிவந்த அங்கோலா மற்றும் மொசாம்பிக் ஆயுதப்படையினருக்கு உதவிட கியூபா ஆயுதப்படையினரை பிடல் அனுப்பி வைத்தார். கியூபா மருத்துவர்கள் மற்றும் ஆசிரியர்களின்  சர்வதேச அளவிலான சேவையின்மூலம் புதிதாக உருவான எண்ணற்ற நாடுகளில் உள்ள மக்கள் பயன் அடைந்தார்கள்.
தோழர் பிடல் காஸ்ட்ரோ மார்ச்சியத் தத்துவத்தையும் நடைமுறையையும் மிகச் சரியாக இணைத்திட்ட ஒரு மார்க்சிய சிற்பியாக வரலாற்றில் இடம் பெறுவார். மாசேதுங் மற்றும் ஹோசிமின் போன்று பின்தங்கியிருந்த நாடுகளில் உள்ள துல்லியமான நிலைமைகளுக்கு ஏற்ப மார்க்சியத்தை பிடல் பொருத்தி, சோசலிசப் பாதையை நோக்கி முன்னெடுத்துச் சென்றார். இது மூன்றாம் உலக நாடுகளில் வியக்கத்தக்க தாக்கத்தை ஏற்படுத்தியது. 
என் தலைமைமுறையைச் சார்ந்த மக்களுக்கு, தோழர் பிடல் புரட்சியின் உயிரோட்டமான சின்னமாகத் திகழ்கின்றார். நான் அவரை முதன்முதலாக 1978இல் ஹவானாவில் நடைபெற்ற உலக இளைஞர் திருவிழாவில் பார்த்தேன், அவரது பேச்சைக் கேட்டேன். அந்த சர்வதேச நிகழ்வின்போது உலகம் முழுதுமிருந்து 20 ஆயிரத்திற்கும் மேற்பட்ட இளைஞர்கள் திரண்டு வந்திருந்தார்கள். பின்னர் 20 ஆண்டுகள் கழித்து, 1998இல் நான் சே குவேராவின் தியாகத்தின் 30ஆம் ஆண்டு விழா சாந்தா கிளாராவில் நடைபெற்றபோது, அதில் கலந்து கொள்வதற்காக சென்றிருந்தபோது அவரைப் பார்த்தேன். அந்த சமயத்தில் தோழர் பிடல் ஆற்றிய உரை இப்போதும் என் நினைவில் நீங்கா இடம் பெற்றிருக்கிறது. கியூபா புரட்சி குறித்து ஓர் ஆய்வினையும் ஏகாதிபத்தியத்திற்கு எதிராக உலகம் முழுதும் நடைபெற்று வரும் போராட்டங்களையும் அப்பேச்சில் அவர் அடிக்கோடிட்டிருந்தார்.
மார்க்சிஸ்ட் கம்யூனிஸ்ட் கட்சி, கியூபா கம்யூனிஸ்ட் கட்சியுடன் நெருங்கிய உறவுகளைப் பேணிப் பாதுகாத்து வந்திருக்கிறது. இந்தியாவில் உள்ள இடதுசாரி மற்றும் முற்போக்கு சக்திகள் கியூபா புரட்சியினால் எப்போதும் உத்வேகம் பெற்று வந்திருக்கிறார்கள். சோவியத் யூனியன் வீழ்ச்சிக்குப்பின்னர், அமெரிக்கா கியூபாவிற்கு எதிராகத் தன்னுடைய பொருளாதாரத் தடையை இறுக்கிப்பிடித்தபோது,  கியூபா மிகவும் மோசமான பொருளாதார இக்கட்டில் இருந்தது. அந்த சமயத்தில் தோழர் ஹ்ர்கிசன் சிங் சுர்ஜித் தலைமையில், இந்தியாவிலிருந்து, கோதுமை அனுப்பிட ஒருமைப்பாட்டுப் பிரச்சாரம் மேற்கொள்ளப்பட்டது. அதன் விளைவாக, 1992 டிசம்பரில் 10 லட்சம் டன் கோதுமை அனுப்பி வைக்கப்பட்டது.  பிடல் ஹவானா துறைமுகத்திற்கு வந்து சுர்ஜித் முன்னிலையில் கோதுமை ஏற்றி வந்த கப்பலை பெற்றுக்கொண்டார். அந்த சமயத்தில் பிடல் பேசுகையில், “10.105 டன் கோதுமையும், மருந்துப் பொருள்களும் என்பதன் பொருள் ஓர் அடையாளத்தைவிட அதிகமானதாகும். இந்த 10,105 டன் ஒருமைப்பாடும், 10,105 டன் தார்மீக ஆதரவும் எங்களை மேலும் அதிக அளவிலான சர்வதேசவாதியாகவும், மேலும் அதிக அளவிலான நாட்டுப்பற்றாளர்களாகவும். மேலும் அதிக அளவிலான புரட்சியாளர்களாகவும், நம்முடைய உன்னதமான லட்சியத்தினைக் காப்பாற்றுவதற்கான உறுதிபடைத்தவர்களாகவும் மாற்றிடும்” என்றார்.
அமெரிக்கா ஏற்படுத்தி இருந்த 50 ஆண்டுகளுக்கும் மேலான  பொருளாதாரத் தடைக்குப்பின்னர், கியூபா முதலாளித்துவத்தின் சுரண்டல் அமைப்பை நிராகரித்து, சோசலிச அமைப்புடன் ஓர் உன்னதமான நாடாக சுதந்திரமான நாடாக உயர்ந்து நிற்கிறது. இது பிடலின் புரட்சிகர பாரம்பர்யமாகும்.
-பிரகாஷ் காரத்-
(தமிழில்: ச.வீரமணி)

நன்றி- தேனீ

பிடல் மானிட விடுதலை வரலாற்றின் அழுத்தமான குறியீடு

எம்காலத்தின் நாயகன் பிடல். பிடல் காலத்தில் நாமும் வாழந்தோம் என்பது எமக் கொரு பெருமிதத்தை தருகிறது.
மார்க்ஸ் மரணித்த போது இரங்லுரையாற்றிய ஏங்கல்ஸ் எம்காலத்தின் மாபெரும் சிந்தனையாளன் தான் சிந்திப்பதை நிறுத்திக் கொண்டான் என்று  குறிப்பிட்டார்.
தற்போது மார்க்சிய வழி சிந்தனையாளன் செயற்பாட்டாளன் தனது சிந்தனையையும் செயற்பாட்டையும் நிறுத்திக் கொண்டான்.
உலகளாவிய ஒடுக்கப்பட்ட மக்களின நம்பிக்கை நடசத்திரம் பிடல்.
ஒடுக்கப்பட்ட மக்களின் சர்வதேசியம் அந்த மகத்தான உள்ளத்திலே குடி கொண்டிருந்தது.
அமெரிக்காவின் அருகிருக்கும் கியூபா என்ற அந்த தீவு உலகத்திற்கு ஒடுக்கப்பட்ட தேச மக்களுக்கு விடுதலை என்ற செய்தியை சொல்லிக் கொண்டிருந்தது.
அந்த கியூபா பிரசவித்த மகத்தான ஆழுமை.
சுதந்திரப்போராட்டத்தில் ஈடுபட்டபலர் நாளடைவில் உள்ளம் சிதைந்து போனார்கள்.
பிடல் விதிவிலக்கு. புரட்சியில் பங்கெடுத்த நாளில் இருந்து அதே உன்னதமான கனவுகளுடன் தனது இறுதி மூச்சுவரை வாழ்ந்தவர் .
 அந்த ஆளுமை இலத்தீன் அமெரிக்கர்களை மாத்திரமல்ல. 5 கண்டங்களையும் ஆகர்சித்தது.
 பஞ்சமும் நோயும் பாழ்பட்டு வறுமை மிஞ்சிய மக்களுக்கெல்லாம் அவர் நம்பிக்கை நட்சத்திரம்.
நீதியான உலகினைப் படைக்கமுடியும் என்பதை இறுதி மூச்சுவரை நிலைநாட்ட முயன்றவர். உலகின் பல தேசங்களில் விடியல் கீதங்களை இசைக்கப் பங்களித்தவர்.
மூன்றாம் உலகின் உண்மையான தலை சிறந்த நண்பன் தோழன். 1950களின் முற்பகுதியில் கொடுங்கோலன் பட்டிஸ்டாவின் மன்காடா இராணுவ முகாம் தாக்குதலில் கைது செய்யப்பட்ட பிடல் இராணுவ நீதிமன்றத்தில் “வரலாறு என்னை விடுதலை செய்யும்”; என்ற புகழ்பூத்த உரையை ஆற்றினார்.
அது மாநிட நேயத்தின் பிரகடனம். நாம் யாருடைய விடுதலைக்காகப்போராடுகிறோம் எத்தனை கனவுகள் எம்முள் எழுந்தன என்று உலகமாநிட மனச்சாட்சியை தொடும்படியாக உரையாற்றனார்.
அன்றைய அணிசேரா நாடுகளாகட்டும், அங்கோலா நமீபியாவின் விடுதலையாகட்டும், தென்னாபிரிக்க தேசிய விடுதலைப்போராட்டமாகட்டும் பிடலின் கியூபாவின் அழுத்தமான பிரசன்னம் இருந்தது.
யுக புருசன்
தனது இறுதி நாட்கள் வரை சாதாரண மக்களின அதிகாரம் பற்றிய தனது நம்பிக்கைகளை கைவிடவில்லை.
அமெரிக்காவின் படலையில் சாமானியர்களின் அதிகாரத்தை நிலை நாட்டியவர்.
லத்தீன் அமெரிக்காவின் விடிவெள்ளியாக எழுந்தவர்.
நூற்றுக்கணக்கான படுகொலை சதிகளில் இருந்த தப்பித்தவர்.
எண்ணற்ற பொருளாதார தடைகள் மத்தியில் கியூபாவை- லத்தீன் அமெரிக்காவின் பல நாடுகளை கம்பீரமாக எழுந்து நிற்கச் செய்தவர்.
கல்வி வைத்திய துறைகளில் மாபெரும் மறுமலர்ச்சி பிடலி;ன் கியூபாவில் ;நிகழ்ந்தது.
இந்த மறுமலர்ச்சி கியூபாவுடன் நிற்கவில்லை .  பாழ் பட்டுவறுமை மிஞசிய உலக மானிடத்துடன் பகிர்ந்து கொள்ளப்பட்டது.
பயங்கர நோய்கள் ,பெரு வெள்ளம் யுத்தப் பேரழிவுகள் நிகழ்ந்த இடங்களுக்கெல்லாம் கியூபாவின் வைத்திய சேவை கிடைத்தது. இறுதியாக எபோலா தாக்கிய மேற்கு ஆபிரிக்கரிவற்கு கியூப மருத்துவக் குழு உடனடியாக விரைந்தது.
பொருளாதார தடைகள் எத்தனையோ ஏகாதிபத்திய கெடுபிடிகள் மத்தியில் கியூபா கைமாறு கருதாது தனது சர்வதேச சகோதரத்துவத்தை உறுதிப்படுத்தியது.
அங்கோலா நமீபியா தென்னாபிரிக்க விடுதலைக்கு கியூபா தோள் கொடுத்தது.
மண்டெலா கொடுஞ்சிறையில் இருந்தபோது வின்னி மண்டெலா ஊடாக விருது வழங்கி கௌரவித்தது.
நிறவெறி காலனி ஆதிக்கம் ஏகாதிபத்திய சுரண்டல் சூறையாடல் இவற்றுக்கெதிராக உறுதியா நின்றது கியூபா.
அமெரிக்காவால் 1960களின் முற்பகுதியில் தொடுக்கப்பட்ட பன்றி வளைகுடா நெருக்கடி மற்றும் 1962 இல் அணுவாயுத யுத்தம் மூழலாம் என்று கருதப்பட்ட ஏவுகணை நெருக்கடி எல்லாவற்றையும் தாண்டியது பிடலின் கியூபா
உலகின் பொதுவுடைமை முகாம் நேருவின் தலைமையிலான இந்தியா சுகர்ணோவின் தலைமையிலான இந்தோனேசியா உட்பட சோசலிச சமூக ஜனநாயக உலகின் உயிhத்துடிப்புள்ள நண்பனாக தன்ளை வரிந்து கொண்டது 1959 புரட்சியின் பின்னான கியூபா.
சே இந்த நாடுகளுக்கெல்லாம் நட்புறவுப் பயணம் மேற் கொண்டார். அணிசேரா இயக்கதின் நிகரற்ற நண்பர்  .உற்சாகமான பங்காளர்
லத்தீன் அமெரிக்காவில் ஏற்பட்டு வரும் எழுச்சிகளின் மூலவிசை பிடல்.
கருத்துவேறுபாடுகளையும் நாகரிகமான முறையில் எதிர் கொள்பவர்.
அவருடைய முகம் குரல் இறுகியதாக இருப்பதில்லை.
அவருடைய பேச்சாற்றல் பிரமிக்கவைப்பது.
இலத்தீன் அமெரிக்காக்ளை கிளர்ச்சி கொள்ளவைப்பது.
அவருது ஐ. நா உரையொன்று மிகப்பிரபலமானது. 4 மணிநேரத்திற்கு மேல் நீடித்தது. இதுவரை அவவளவு நேரத்திற்கு யாரும் உரையாற்றவில்லை.
1990 சோவியத் உடைவிற்கு பின்னும் சோசலிசப்பதாகையை உயர்த்தியபடி அந்த சின்னஞ்சிறு தீவு நிமிர்ந்து நின்றது.
அமெரிக்காவை கதரினா புயல் தாக்கியபோது கியூபாவில் இருந்து வைத்தியர்களை அனுப்பிவைக்கவா என்று கேட்டவர்.
பாப்பரசரை வரவேற்க அவர் பின் நிற்கவில்லை.
அண்மையில் சரித்திர முக்கியத்துவம் வாயந்த ஒபமாவின் கியூபா பயணம் நிகழ்ந்தது. அமெரிக்க கியூபா இராஜதந்திர உறவு மீண்டும் புதுப்பிக்கப்பட்டது .
விடாப்பிடியான கொள்கை உறுதியுடன் அவர் உலகளாவிய உறவுகளைப்பேணினார்
மார்க்சின் கனவுகளின் வாரிசு.
ஒக்டோபர் புரட்சியின் தெடர்ச்சி உறுதுணையாக நின்றது.
சர்வதேசியவாதி.
உலகின் இளம்புரட்சியாளர்களின் உன்னத வழிகாட்டி.
தோழர் பிடலின் நினைவுகள் மனித நேய நெஞ்சங்களில் தலைமுறைகள் தாண்டி நிலைக்கும் .
தோழர் சுகு- ஸ்ரீதரன்

20 November 2016

இனவாதம் பேசினால் தயவு தாட்சண்யமின்றி நடவடிக்கை

நாட்டுக்குள் இனிமேல் இனவாதம் பேசும் அனைவருக்கும் எதிராக, தயவு தாட்சண்யமின்றி, இனமத பேதங்கள் பார்க்காமல் நடவடிக்கை எடுக்க பொலிஸ் மாஅதிபருக்கு ஜனாதிபதி மைத்திரிபால சிறிசேன உத்தரவிட்டுள்ளார். நேற்று முன்தினம் இரவு எட்டு மணியிலிருந்து பத்து மணிவரை சுமார் 2 மணிநேரம் நடைபெற்ற பாதுகாப்பு கவுன்சில் கூட்டத்தில் நாட்டுக்குள் இனவாதத்தை தூண்டிவிடும் நடவடிக்கைகள் தொடர்பில் விரிவாக ஆராயப்பட்டது.

இதன்போது அமைச்சர்கள், அதிகாரிகள் அனைவரது கருத்துகளையும் செவிமடுத்த ஜனாதிபதி மைத்திரிபால சிறிசேன,மேற்படி உத்தரவை பிறப்பித்துள்ளார் பாதுகாப்பு கவுன்சில் கூட்டத்தில், ஜனாதிபதி மைத்திரிபால சிறிசேன, பிரதமர் ரணில் விக்கிரமசிங்க, அமைச்சர்களான விஜேதாச ராஜபக்ச, சம்பிக்க ரணவக்க, மனோ கணேசன், ரவூப் ஹக்கீம், ரிசாத் பதியுத்தீன், சாகல ரத்நாயக்க, டி.எம்.சுவாமிநாதன், ருவன் விஜயவர்த்தன மற்றும் ரத்தின தேரர் எம்பி, ஜனாதிபதியின் செயலாளர், பொலிஸ் மாஅதிபர், முப்படை தளபதிகள், சட்டம் ஒழுங்கு அமைச்சின் செயலாளர், பாதுகாப்பு அமைச்சின் செயலாளர் ஆகியோர் கலந்துகொண்டனர்.

பயங்கரவாத தடைச் சட்டத்தை நடைமுறைப்படுத்துவோம்

இலங்கையில் இனவாதத்தையோ மத அடிப்படை வாதத்தையோ ஏற்படுத்துவோருக்கு எதிராக தராதரம் பாராது கடும் நடவடிக்கை எடுக்கப்படும் என நீதி மற்றும் பௌத்த விவகார அமைச்சர் விஜயதாச ராஜபக்ஷ தெரிவித்தார். தேவைப்படின் பயங்கரவாதத் தடைச்சட்டத்தையும் பிரயோகித்து இத்தகையோருக்கு எதிராக செயற்பட நேரிடும் எனவும் அவர் குறிப்பிட்டார்.
அரசியலில் குதிக்கும் நோக்கத்துடன் சில பிக்குமார் இனவாதத்தை தூண்டி பௌத்த மக்களை கவர முயல்வதோடு, முஸ்லிம் அமைப்புக்களுக்கிடையிலான மோதல் காரணமாக உள்ளக பிரச்சினை தேசிய பிரச்சினையாக மாறி வருவதாகவும் குறிப்பிட்டார். வரவு-செலவுத்திட்ட  இரண்டாம் வாசிப்பு மீதான ஆறாம் நாள் விவாதத்தில் உரையாற்றியபோதே அவர் இது குறித்து தெரிவித்தார்.

பௌத்த மக்கள் வாழாத பிரதேசங்களில் புத்தர் சிலைகளை வைத்துவிட்டு முஸ்லிம், தமிழ் மக்கள் சிலைகளை உடைப்பதாக குற்றஞ்சாட்டி பிரச்சினை உருவாக்க முயற்சி நடப்பதாகவும் குறிப்பிட்ட அமைச்சர், இன்று முதல் இனவாதத்திற்கோ மத அடிப்படைவாதத்திற்கோ இடமில்லை எனவும் தெரிவித்தார். பௌத்த மதத்தை போன்றே ஏனைய மத சுதந்திரத்தையும் மதிக்க வேண்டும் என்றும் வலியுறுத்திய அவர், இது அனைவரதும் நாடு எனவும் இனவாதம், மதவாதம், அடிப்படைவாதம் என்பவற்றை தூண்டி இரத்த ஆறு ஓடவைக்காது ஒரே தாய் மக்களாக வாழ முன்வர வேண்டும் எனவும் கோரிக்கை விடுத்தார்.

பௌத்த பிக்கு ஒருவர் வடக்கிற்கு சென்று இந்து மதத்தவர் ஒருவருக்குச் சொந்தமான காணியில் விகாரை அமைத்துள்ளார். இது குறித்து தமிழ்த் தேசியக் கூட்டமைப்பின் எம்.பி ஒருவர் பாராளுமன்றத்தின் கவனத்துக்குக் கொண்டுவந்திருந்தார். அவருடன் கலந்துரையாடியதுடன், நிலைமைகளை அவர் புரிந்துகொண்டார். இது தொடர்பில் நாம் அரச அதிபருடன் பேசி அந்த இந்து பக்தருக்கு காணியைப் பெற்றுக்கொடுத்தோம்.
கடந்த நாட்களில் சமூக வலைதளங்கள் நாட்டுக்குப் பெரும் பிரச்சினையாக மாறியுள்ளன. பிக்கு ஒருவர் தமிழர்களுக்கும், முஸ்லிம்களுக்கும் தூற்றுவதாக இணையதளங்களில் கதை வெளியிடப்பட்டது. அவர்களை தாக்க வேண்டும், கொலை செய்ய வேண்டும் போன்ற கருத்துக்கள் கூறப்படுகின்றன. இந்த நாட்டில் தௌஹித் ஜமாஅத் என்ற ஒரு அமைப்பு உள்ளது. சில நாட்களுக்கு முன்னர் அதன் தலைவர் எனக் கூறப்படும் ஒருவர் பௌத்த மதத்தை கேவலப்படுத்தும் வகையில் கருத்துக் கூறியிருந்தார். அவரை நாம் கைது செய்துள்ளோம்.

முஸ்லிம் அடிப்படைவாதமானாலும் சரி, சிங்கள அடிப்படைவாதமானாலும் சரி, வேறு எந்த அடிப்படைவாதமாக இருந்தாலும் சரி, இந்த நாட்டில் செயற்படுத்த எவராவது முயற்சிப்பாராயின் அதற்கு இடமளிக்க மாட்டோம்.முஸ்லிம் அமைப்புக்களை எடுத்துக்கொண்டால், தௌஹீத் ஜமாஅத், சுன்னத் வல்ஜமஅத், ஜமாஅதே இஸ்லாம் போன்ற அமைப்புகள் இந்நாட்டில் இயங்குகின்றன. இந்தக் குழுக்களிடையேயும் மோதல்கள் இடம்பெற்று வருகின்றன. சில இடங்களில் மனித கொலையும் இடம்பெற்றுள்ளது. பாரிய சம்பவங்கள் 15 அறிக்கையிடப்பட்டுள்ளது. அவர்களின் உள்ளக முரண்பாடு நாட்டின் தேசிய முரண்பாடாக மாறி நாட்டை அராஜக நிலைமை ஏற்பட இடமளிக்கமாட்டோம்.

கடந்த சில நாட்களாக சர்வதேசத்துடன் இணைந்து, இந்த நாட்டின் சட்ட மறுசீரமைப்பு குறித்து பேசப்படுகின்றது. முஸ்லிம் பெண்களின் திருமண வயது குறித்து பிரச்சினை எழுப்பப்படுகிறது. இது சமயம் மற்றும் கலாசாரத்துடன் தொடர்புபட்ட விடயம். இதனை நாம் தடுக்கவில்லை. உரிய தீர்வொன்றை பரிந்துரைக்குமாறு முஸ்லிம் உறுப்பினர்களிடம் பொறுப்பை வழங்கியுள்ளோம்.

மாத்தளை பிரதேசத்தில் 13 வயது சிங்கள பெண் பிள்ளையை முஸ்லிம் ஒருவர் பணம் இருப்பதால் திருமணம் முடித்துள்ளார். இதை சிங்கள மக்கள் ஏற்றுக்கொள்ளமாட்டார்கள். முஸ்லிம்களைத் தவிர்ந்த ஏனைய அனைவருக்கும் திருமண வயது 18 ஆகும். இவ்வாறான சில சம்பவங்களை அடிப்படையாகக் கொண்டு ஒட்டுமொத்த சமூகத்தையும் திசை திருப்ப எடுக்கும் முயற்சிகளுக்கு இடமளிக்க மாட்டோம்.

இதேவேளை, சமூக வலைதளங்களின் செயற்பாடுகள் பற்றி குறிப்பிட வேண்டும். சமூகவலைத்தளங்களைக் கட்டுப்படுத்தவேண்டிய தேவை எமக்கு இல்லை. இருந்தாலும் அவை சட்டவிரோத செயற்பாடுகளில் ஈடுபடுமாயின், அதனூடாக நாட்டின் தேசிய ஒற்றுமையை சீர்குலைக்குமாயின், சட்டத்தை நடைமுறைப்படுத்த தயங்கப்போவதில்லை. ஊடகங்களுக்கு வழங்கப்பட்டிருக்கும் சுதந்திரம் சில சமயத்தில் தவறாகப் பயன்படுத்தப்படுகிறது.

நாம் இப்போது சட்டங்களை மாற்றி வருகின்றறோம். சட்டமறுசீரமைப்பை மேற்கொள்கின்றோம். 19 ஆவது சட்டத்தை கொண்டுவந்து நிறுவனங்களை சுயாதீனமாக்கினோம். இப்போது குற்றவியல் தண்டனை சட்டத்தை திருத்தச் செய்யவேண்டிய தேவை உள்ளது. எமது நாட்டில் பயங்கரவாத தடைச் சட்டத்துக்குப் பதிலாக சர்வதேச தரத்திலான அதைவிட சிறந்த சட்டம் கொண்டுவர வேண்டும் என்று யோசனை உள்ளது. சர்வதேசம் எமக்கு என்ன கூறினாலும், எமது நாட்டு மக்களுக்குப் பொருத்தமான சட்டத்தைத்தான் அரசாங்கம் கொண்டுவரும் என நான் தெளிவாகக் குறிப்பிடுகின்றேன்.
இனவாத பிரச்சினைகள் தலைதூக்கி, இரத்தம் வழிந்தோடும் நிலையை உருவாக்க மேற்கொள்ளும் முயற்சிகளை முறியடிக்க அவசியமெனில், இதுவரை நடைமுறைப்படுத்தப்படாதிருந்த பயங்கரவாத தடைச் சட்டத்தை நடைமுறைப்படுத்துவோம். பௌத்த, இந்து, இஸ்லாம், கிறிஸ்தவ மக்கள் மற்றும் சமயத் தலைவர்கள், அரசியல் தலைவர்கள், அந்தந்த இனங்களைப் பிரதிநிதித்துவப்படுத்தும் தலைவர்கள் என சகலரும் ஒத்துழைப்பு  வழங்க வேண்டும்.

நாட்டின் நீதித்துறை தொடர்பில் உலக நாடுகள் மத்தியில் நம்பிக்கையை ஏற்படுத்தியுள்ளோம்.
எம்மை விமர்சிக்கும் பொது எதிர்க்கட்சியின் தினேஸ் குணவர்தன எம்.பியும் பாராட்டியுள்ளார். இவ்வாறான நிலையில், இணையத்தளமொன்று எமது நாட்டின் நீதித்துறைக்கு அபகீர்த்தியை ஏற்படுத்தும் வகையில் செய்திகளை வெளியிட்டு வருகிறது. குறிப்பாக நீதிபதிகளை விமர்சித்து வருகிறது. இதனை இயக்குபவர் வெளிநாட்டில் இருந்து செயற்படுகிறார். ஒருவர் மீது சேறு பூசுவதற்கு பணம் அறவிடுகின்றனர்.

நீதித் துறைக்கு அபகீர்த்தியை ஏற்படுத்தினார் என வழக்குத் தொடர்ந்து குறித்த நபருக்கு எதிராக சர்வதேச பிடிவிறாந்து பிறப்பிக்க நடவடிக்கை எடுக்கப்படும் என்றும் கூறினார்.

நாட்டின் தேசிய பாதுகாப்புக்கு அச்சுறுத்தல் ஏற்படுத்தும் வகையிலான எந்தச் செயற்பாடுகளுக்கும் நாம் இடமளிக்க மாட்டோம். பௌத்தர்கள் என்ற அடையாளம் எமக்குத் தேவை. அதுபோல இந்துக்கள், இஸ்லாமியர்கள், கிறிஸ்தவர்கள் இருக்கின்றனர். அவர்களுக்கும் அடையாளம் உள்ளது. ஆனால், அனைவருக்கும் இலங்கையர் என்ற அடையாளம் அவசியம் எனவும் தெரிவித்தார்.

16 November 2016

நல்லிணக்கத்திற்கு கடும் பாதிப்புகளை ஏற்படுத்தக்கூடிய சமீபத்திய சம்பவங்கள்

சில பௌத்த துறவிகளால் பயன்படுத்தப்படும் கடுமையாக கண்டிக்கப்பட வேண்டிய வார்த்தைகள் – சந்தேகத்திற்கு இடமின்றி வன்முறையையும் பௌத்த உணர்வினைக் கொண்டிராதவையும் – குறிப்பாக சமூக ஊடகங்களில் பரவலாக காணமுடிபவை – கலக்கமளிப்பவையாகவும் கண்டிக்கப்படவேண்டியவையாகவும் காணப்படுகின்றன. இந்த வன்முறைக்கு பழகிப்போன, அசிங்கமான வார்த்தைகளைப் பயன்படுத்தும், சிறிய எண்ணிக்கையிலான பௌத்த மதகுருமார் அமைதி, சமாதானத்தை அடிப்படையாக கொண்ட மதத்திற்கு அபகீர்த்தியை ஏற்படுத்துவதுடன், நல்லிணக்கம், ஒழுக்கம் போன்றவற்றிற்காக அயராது குரல்கொடுத்தவரும், தற்போது இடம்பெறும் சீர்த்திருத்தங்களின் சிற்பியுமான மாதுலுவாவே சோபித தேரருக்கும் அபகீர்த்தியை ஏற்படுத்துகின்றனர். இதேவேளை, பல பௌத்த மதகுருமார் நல்லிணக்க மற்றும் சமாதான முயற்சிகளில் சமூகமட்டத்தில் ஈடுபட்டுள்ள போதிலும் அது மையநீரோட்ட ஊடகங்களின் கவனத்தை ஈர்ப்பதில்லை.

    இவ்வாறான சம்பவங்கள் பல, நாடு அமைதி, சமாதானம், நல்லிணக்கம், சீர்திருத்தம் ஆகியவற்றை நோக்கி மேற்கொண்டிருக்கும் பயணத்தை சீர்குலைப்பதற்காக, ஆழமான அரசியல் உள்நோக்கங்கள் கொண்ட சக்திகளின் தூண்டுதலுடனேயே இடம்பெறுகின்றன என்று தோன்றுகின்றது. இன மற்றும் மத பகைமை உணர்வு என்ற மோதல் மற்றும் அரசியல் சூழ்ச்சி குறித்த சந்தேகங்கள் மற்றும் வதந்திகளால் மேலும் தீவிரமடைகின்றது. குறிப்பாக சட்டத்தின் ஆட்சியை அச்சமின்றி பக்கச்சார்பின்றி அமுல்படுத்த முடியாத கவலை தரும் நிலையில் அல்லது அலட்சிய நிலையில் அரச ஸ்தாபனங்கள் காணப்படுவதும் சுட்டிக்காட்டப்படவேண்டிய விடயம்.

    அவ்வாறான வதந்திகள் ஆதாரமற்றவையாகக் காணப்பட்டாலும், அரசாங்கத்தின் கையாலாகத்தனம், அலட்சியம் அல்லது பலவீனம் குறித்த அபிப்பிராயம் உருவாவதற்கு வழிவகுப்பது பிரிவினையும்  வெறுப்புணர்வையும் விதைக்க நினைப்பவர்களை பலப்படுத்துவதாக அமையும். அதிகரிக்கப்பட்ட அதிகாரங்களையும், ஸ்தாபனங்களின் சுயாதீனத்தையும் நடைமுறைப்படுத்துவதற்கான திறனோ அல்லது விருப்பமோ இல்லாத பட்சத்தில் அரசமைப்பின் 19ஆவது திருத்தத்தினால் அறிமுகப்படுத்தப்பட்ட சீர்திருத்தங்கள் அர்த்தமற்றவையாகிவிடும், குறிப்பாக சட்டமொழுங்கு குறித்த தீர்மானங்கள்.

    சிறியளவு குழப்பச்செயல்களும் ஒத்திசைவின்மையும் சமூக ஊடகங்களின் இன்றைய காலத்தில் அளவுக்கதிகமாக முக்கியத்துவம் பெறுகின்றன என்பது உண்மை. எனினும், கடந்த வருடம் இலங்கையின் அனைத்து சமூகங்களும் ஆட்சி மாற்றத்திற்காகவும் யுத்தத்திற்கு பிந்திய சீர்த்திருத்தங்களிற்காகவும் ஒருமித்து வாக்களித்து தேசத்தின் மனோநிலையில், மிகச்சிறந்த மாற்றத்தை வெளிப்படுத்தியிருந்தது. மக்களால் ஆணை வழங்கப்பட்ட அரசமைப்பு மற்றும் அரசியல் சீர்திருத்தங்களை நோக்கிய எங்கள் பயணம் இன்னமும் அரைவாசி தூரத்தைக் கூட சென்றடையாத தருணத்தில் மேற் குறிப்பிட்ட சம்பவங்கள் இடம்பெற்றுள்ளன. எமது எதிர்கால சமாதானம், செழிப்பு, மகிழ்ச்சி ஆகியவற்றிற்கு மிகவும் அவசியமான  நல்லிணக்கம், நீதி மற்றும் நல்லாட்சி போன்றவற்றுக்கு ஆபத்தை ஏற்படுத்துகின்றன. நாங்கள் தற்போது மீண்டுவந்துள்ள இருண்ட யுகத்திற்கு மீண்டும் எங்களை கொண்டு செல்ல அவை முயல்கின்றன.

    வெறுப்பூட்டும், இத்தகைய சக்திகளிற்கு எதிராக உறுதியான, கொள்கைபிடிப்புள்ள தலைமைத்துவத்தை வழங்கவேண்டிய, ஜனநாயக விழுமியங்களான பன்முகத்தன்மை மற்றும் சகிப்புதன்மை ஆகியவற்றிற்கான தங்கள் அர்ப்பணிப்பினை மீள வலியுறுத்தியவேண்டிய, அச்சுறுத்தல் மற்றும் வன்முறைகளிற்கு மத்தியில் தங்கள் செயற்பாடுகளை மேற்கொள்வதற்கான நம்பிக்கையை பொலிஸ் மற்றும் சட்ட ஒழுங்கை அமுல்படுத்தும் அதிகாரிகளிற்கு வழங்கவேண்டிய கடப்பாடு ஜனாதிபதி மற்றும் பிரதமரிற்குள்ளது. அரசியல் கலாச்சாரம் மற்றும் பின்பற்றுதல்கள் இல்லாதபட்சத்தில் நீதி மற்றும் ஸ்தாபன சீர்திருத்தங்கள் அர்த்தமற்றவையாகிவிடும் என்பதை நாங்கள் மீண்டும் நினைவுபடுத்துகின்றோம். ஆகவே, இதனடிப்படையில் உறுதியான அரசியல் தலைமைத்துவம் என்பது அவசியமானது. குழப்பத்தை ஏற்படுத்தும் இந்த தனிநபர் மற்றும் குழுக்களின் ஏற்றுக்கொள்ள முடியாத நடத்தையை மத மற்றும் சமூக தலைவர்களும், பிரஜைகளும் பகிரங்கமாக கண்டிக்கவேண்டும்.

    இத்தைகைய சம்பவங்கள் மற்றும் அதனைத் தூண்டுபவர்களிற்கு எதிராக (அவர்கள் எத்தகைய சமூக அந்தஸ்த்தைக் கொண்டிருந்தாலும்) உறுதியான மற்றும் நேர்மையான நடவடிக்கைகளை எடுக்காவிட்டால், இவை கட்டுக்கடங்காத நிலைக்கு செல்லலாம். ஒரு வருடத்திற்கு முன்னர் ஒரு தடவை அல்ல இரண்டு தடவைகள் சீர்த்திருத்தத்திற்காகவும் நல்லிணக்கத்திற்காகவும் வாக்களித்த தீர்க்கமான பெரும்பான்மையான விவேகமுள்ள எந்தவொரு இலங்கையரும் எமது நாடு மீண்டும் மோதல் மற்றும் பகைமையுணர்வை நோக்கி மீண்டும் திரும்புவதை விரும்பவில்லை. எமது அனைத்து மக்களினதும்  ஜனநாயக ஆட்சிக்கான  விருப்பம் மற்றும் அதனை தக்கவைப்பதற்காக தற்போது இடம்பெறும் முயற்சிகள் ஆகியன வெறுப்பு மற்றும் தீயநோக்கங்களைக் கொண்ட சக்திகள் குறித்த அலட்சியம்,  பலவீனங்கள் காரணமாக வீணாகிப்போவதற்கு நாம் இடமளிக்கக்கூடாது.

-மாற்றுக் கொள்கைகளுக்கான நிலையம் -